 |
| སྦིས་གཤོང་འབྲིང་རིམ་སློབ་གྲྭ་བར་མའི་ སློབ་ཕྲུག་ཚུ་གིས་ འབྲོང་གྱིམ་ཙེའི་ བྱུང་ཚུལ་གྱི་སྐོར་ལས་ མི་མང་ལུ་འཁྲབ་སྟོན་ཅིག་ སྟོན་པའི་བསྒང་། |
ཨིན་རུང་ གྲངས་རྩིས་དེ་ བརྟན་ཏོག་ཏོ་མེད་ཟེར་ གླིང་ཁའི་འགོ་དཔོན་ ཕུན་ཚོགས་ཀྱིས་ སླབ་ཡོདཔ་ད་ དེ་ཡང་ སེམས་ཅན་དེ་ས་གནས་གཅིག་ལས་གཅིག་ནང་ གནས་སྤོ་འགྱོ་ཡི་ར་ སྡོད་མི་ཅིག་འབད་ནི་དེ་གིས་ གྱངས་ཁ་ངེས་ཏིག་ རྐྱབ་མི་ཚུགས་པས་ཟེར་ཨིན་པས།
རྒྱལ་ཁབ་ནང་ རྒྱལ་ཡོངས་ཀྱི་སེམས་ཅན་ ཉམས་སྲུང་འབད་ཚུགས་མི་དེ་ཡང་ རི་དྭགས་སེམས་ཅན་ཉམས་སྲུང་གི་སྲིད་བྱུས་ ལེགས་ཤོམ་ཡོད་པའི་ཁར་ སེམས་ཅན་འཁྱམས་སའི་ ས་ཁོངས་ཚུ་ནང་སྡོད་མི་ཚུ་གིས་ སེམས་ཅན་ཚུ་ལུ་ གནོད་སྐྱོན་མ་རྐྱབ་མི་ལུ་བརྟེན་ཨིན་ཟེར་ ཕུན་ཚོགས་ཀྱིས་ སླབ་ཨིན་པས།
རྒྱལ་ཡོངས་ཀྱི་སེམས་ཅན་ ཉམས་སྲུང་གི་དོན་ལུ་ གཞུང་གིས་ ལས་རིམ་ལེ་ཤ་ཅིག་ར་ འགོ་འདྲེན་འཐབ་མིའི་གྲས་ལས་གཅིག་ སྤྱི་ཟླ་༢ པའི་ཚེས་༢༡ ལུ་ མགར་ས་རྫོང་ཁག་ དགོན་དམ་སྦྱིས་ལུ་ ལོ་བསྟར་འབྲོང་གྱིམ་ཙེའི་ཉིནམ་ བརྩི་སྲུང་འབད་མི་དེ་ཨིནམ་ད་ དེའི་དམིགས་ཡུལ་གཙོ་བོ་ར་ ས་གནས་ཀྱི་མི་ཚུ་གིས་ སེམས་ཅན་ཉམས་སྲུང་འབད་དགོ་པའི་ གནད་དོན་ཚུ་ གོ་བ་བརྡ་སྤྲོད་འབད་ནིའི་དོན་ལུ་ཨིན་པས།
མགར་ས་དེ་ རྒྱལ་ཁབ་ནང་ འབྲོང་གྱིམ་ཙེ་འཁྱམས་སའི་ས་ཁོངས་ སྦོམ་ཤོས་ཅིག་ཨིནམ་ལས་ དེ་ཁར་སྡོད་མི་ མི་སེར་ཚུ་གིས་ སེམས་ཅན་ཚུ་ལུ་ གནོད་སྐྱོན་མ་རྐྱབ་པར་ ལེགས་ཤོམ་སྦེ་ ཉམས་སྲུང་འབད་དགོཔ་ཁག་ཆེ་ནི་དེ་གིས་ ཉིནམ་བརྩི་སྲུང་གི་ལས་རིམ་དེ་ ཁོང་གི་དོན་ལུ་ འགོ་འདྲེན་འཐབ་དོ་ཡོདཔ་ཨིན་པས།
དེ་མ་ཚད་ དུས་སྟོན་ལུ་བརྟེན་ མི་སྡེའི་ནང་ ལྟ་བཤལ་གོང་འཕེལ་གཏང་ནི་ལུ་ཡང་ ཁེ་ཕན་ཡོད་ཟེར་ གླིང་ཁའི་ལས་འགུལ་འཛིན་སྐྱོང་པ་ ལྷུན་གྲུབ་མཐར་ཆེན་གྱིས་ སླབ་ཡོདཔ་ད་ དེ་ཡང་ གནམ་དགུན་ལུ་ ཕྱིའི་ལྟ་བཤལཔ་ མ་འོང་པའི་དུས་ཚོད་ནང་ ཉིནམ་བརྩི་སྲུང་གི་ཐོག་ལས་ ཕྱི་མི་ཚུ་ འོང་ནིའི་སེམས་ཤུགས་བསྐྱེད་བཅུག་སྟེ་ མི་སྡེའི་དཔལ་འབྱོར་གོང་འཕེལ་ གཏང་ནི་ལུ་ཕན་པ་ཡོད་ཟེར་ཨིན་པས།
ལོ་བསྟར་འབྲོང་གྱིམ་ཙེའི་ཉིནམ་ བརྩི་སྲུང་དེ་ དུས་ཅི་འབདཝ་ད་ ཐེངས་༣ པ་ཨིནམ་ད་ ཉིནམ་བརྩི་སྲུང་གི་དོན་ལུ་ འབྲུག་ལྟ་བཤལ་ཚོགས་སྡེ་གིས་ དངུལ་ཀྲམ་འབུམ་༣ ཟད་འགྲོ་བཏང་ཡོདཔ་ད་ ན་ཧིང་འབད་བ་ཅིན་ ཚོགས་སྡེ་གིས་ དངུལ་ཀྲམ་ས་ཡ་༢.༧ གྲོགས་རམ་འབད་ཡོདཔ་ཨིན་པས།
ཚོགས་སྡེའི་ ལྟ་བཤལ་འགོ་དཔོན་ལས་རོགསཔ་ ཀརྨ་འཇིགས་མེད་ཀྱིས་ སླབ་མིའི་ནང་ ཁོང་གི་ཧོངས་ལས་ མ་དངུལ་གྱི་གྲོགས་རམ་འབད་མི་དེ་ཡང་ འབྲོང་གྱིམ་ཙེ་དེ་ རྒྱལ་ཡོངས་ཀྱི་སེམས་ཅན་ཨིནམ་ འབྲུག་མི་ག་ར་གིས་ ལེགས་ཤོམ་སྦེ་ ཤེས་བཅུག་ནི་དང་ གྲོང་མིའི་གནས་ཚད་ ཡར་དྲག་གཏང་ནིའི་དོན་ལུ་ ཨིན་ཟེར་ཨིན་པས།
ད་ལྟོ་འབད་བ་ཅིན་ ཉིནམ་བརྩི་སྲུང་དེ་ ཚོགས་སྡེ་གིས་ རྒྱབ་སྐྱོར་འབད་དོ་ཡོདཔ་ཨིན་རུང་ ཤུལ་ལས་ དེ་བཟུམ་གྱི་ལས་རིམ་དེ་ མི་སེར་ཁོང་ར་གིས་ འགོ་འདྲེན་འཐབ་ཚུགསཔ་བཟོ་ནིའི་དོན་ལུ་ ལྕོགས་གྲུབ་གོང་འཕེལ་བཏང་དོ་ཟེར་ཨིན་པས།
ཉིནམ་བརྩི་སྲུང་དེ་ མི་དབང་མངའ་བདག་རིན་པོ་ཆེ་མཆོག་གི་ འཁྲུངས་སྐར་དུས་སྟོན་གྱི་ཉིནམ་དང་འབྲེལ་ དམ་སྦྱིས་ལུ་ཡོད་པའི་ སྦིས་གཤོང་འབྲིང་རིམ་སློབ་གྲྭ་བར་མའི་ནང་ འགོ་འདྲེན་འཐབ་པའི་སྐབས་ སློབ་ཕྲུག་ཚུ་གིས་ འབྲོང་གྱིམ་ཙེའི་ བྱུང་ཚུལ་གྱི་སྐོར་ལས་ འཁྲབ་སྟོན་གྱི་ཐོག་ལུ་ མི་མང་ལུ་གོ་བ་བརྡ་སྤྲོད་འབད་ཡོདཔ་ད་ དེ་ཡང་ སེམས་ཅན་དེ་ ཧེ་མ་ བླམ་འབྲུག་པ་ཀུན་ལེགས་ཀྱིས་ ཁོ་རའི་ རྗེས་འཇུག་ཚུ་ལུ་ གྲུབ་རྟགས་སྟོན་མི་ལས་བྱུང་བའི་ ལོ་རྒྱུས་ཚུ་ཡང་ བཤད་བྱིན་ཡོདཔ་ཨིན་པས།
འབྲོང་གྱིམ་ཙེ་དེ་ འཛམ་གླིང་ནང་ དཀོན་དྲགས་ཅན་གྱི་ སེམས་ཅན་ཅིག་ཨིནམ་ད་ དེ་ཡང་ རྒྱ་ནག་དང་ བར་མ་རྒྱལ་ཁབ་ཚུ་ནང་འབད་བ་ཅིན་ ཤའི་དོན་ལུ་ ལག་ལེན་འཐབ་ནི་དེ་གིས་ ཉམས་འགྱོ་དོ་ཡོདཔ་ཨིན་རུང་ འབྲུག་ལུ་འབད་བ་ཅིན་ མ་ཉམས་པར་ཡོདཔ་ཨིན་པས།
སེམས་ཅན་དེ་ གནམ་བྱཱར་ས་ཁ་མཐོ་སར་ འཁྱམས་སྡོད་དོ་ཡོདཔ་ཨིན་རུང་ དགུན་གྱི་དུས་ཚོད་འ་ནེམ་ཅིག་ཁར་ ས་ཁ་དམའ་ས་ དགོན་དམ་སྦྱིས་དང་ སྤུ་ན་ཁ་ ཁ་སྟོད་ཀྱི་ས་ཁོངས་ཚུ་ནང་ མཐོང་དོ་ཡོདཔ་ཨིན་པའི་གནས་ཚུལ།
མགར་ས་ལས་ བསྟན་འཛིན་རྣམ་རྒྱལ།
No comments:
Post a Comment