དེ་ཡང་ འགོ་འདྲེན་པ་ ནང་སྲིད་དང་ སྲོལ་འཛིན་ལྷན་ཚོགས་ཀྱི་ འགོ་དཔོན་ཚུ་གིས་ སླབ་མི་དང་འཁྲིལཝ་ད་ དུས་སྟོན་ཁྱད་པར་ཅན་དེ་ནང་ མི་དབང་མངའ་ཞབས་མཆོག་གིས་ རྒྱལ་ཡོངས་ལུ་ གསུང་བཤད་གནང་ནི་ཨིནམ་མ་ཚད་ རྒྱལ་ཁབ་དང་ མི་སེར་ལུ་ ཡུན་རིངམོ་སྦེ་ར་ ཁྱད་འཕགས་ཅན་ཐོག་ལུ་ ཕྱག་ཞུ་མི་ཚུ་ ངོས་འཛིན་གྱི་ རྟགས་མ་ཚུ་ཡང་ གནང་ནི་གི་ ལས་འཆར་ཡོད་ཟེར་ཨིན་པས།
དེ་མ་ཚད་ རང་ལུགས་ཀྱི་ ཞབས་ཁྲ་དང་ སྤྲོ་སྟོན་ལས་རིམ་ དེ་ལས་ རྩེད་སྟོན་ཚུ་ཡང་ འདྲ་མ་འདྲཝ་ལེ་ཤ་ཡོད་ཟེར་ ནང་སྲིད་དྲུང་ཆེན་ ཚེ་རིང་རྡོ་རྗེ་གིས་ བདུན་ཕྲག་ཧེ་མའི་ནང་ ཀུན་གསལ་ལུ་ སླབ་ཡོདཔ་ད་ དུས་སྟོན་བརྩི་སྲུང་གི་དོན་ལུ་ ལྕང་གླིང་མི་ཐང་ལུ་འོང་མི་ཚུ་ དྲོ་པའི་ཆུ་ཚོད་༧ ལས་འགོ་བཙུགས་ སྐྱེལ་འདྲེན་བཱསི་ཚུ་གིས་ རིན་མེད་སྟོང་པ་སྦེ་ སྐྱེལ་ལེན་འབད་ནི་ཨིན་པས།
ད་རུང་ མི་མང་ལུ་ རྒྱལ་ཡོངས་དུས་ཆེན་གྱི་ དྲན་རྟེན་ཚུ་ཡང་ བགོ་བཀྲམ་འབད་ནི་ཨིན་པས།
ཉེན་སྲུང་གི་ཐབས་ལམ།
རྒྱལ་ཡོངས་དུས་ཆེན་གྱི་སྐབས་ གནོད་ཉེན་དང་ བར་ཆད་ཚུ་ བཀག་ཐབས་ལུ་ སྤྱི་ཟླ་༡༢ པའི་ཚེས་༡༥ ལས་འགོ་བཙུགས་ དགེ་ལེགས་ཕུག་དང་ གསར་སྤང་གི་བར་ན་ གཞུང་ལམ་ཀི་ལོ་མི་ཊར་༣༢ བདའ་སྟེ་ ཕྱི་རུའི་ཆུ་ཚོད་༥.༣༠ ལས་ དྲོ་པའི་ཆུ་ཚོད་༦ ཚུན་ སྣུམ་འཁོར་ཚུ་ ཕར་ཚུར་འགྲོ་འགྲུལ་འབད་ནི་ བཀག་ཆ་འབད་དེ་ཡོདཔ་ཨིན་པས།
དུས་ཚོད་དེ་ཚུའི་ནང་ གནས་སྐབས་ཅིག་ རྒྱུན་འགྲུལ་བཀག་དམ་འབད་དགོ་མི་དེ་ཡང་ གཞུང་ལམ་བདའ་སྟེ་ ལམ་འགྲུལ་འབད་མི་ཚུ་ལུ་ གནོདཔ་བཀལ་ནི་དང་ བཙན་ཁྲིད་འབད་ནི་ཚུ་ལས་ བཀག་ཐབས་ལུ་ཨིན་ཟེར་ ནང་སྲིད་བློན་པོ་ མི་འགྱུར་རྡོ་རྗོ་གིས་ སླབ་ཨིན་པས།
ནང་སྲིད་བློན་པོ་གིས་འབད་བ་ཅིན་ གཞུང་གི་ཆེ་མཐོ་འགོ་དཔོན་ཚུ་དང་ ཁྲིམས་བསྟར་སྤྱོད་འབད་མི་ ལས་སྡེ་ཚུ་དང་ གྲོས་བསྟུན་འབད་ཐོག་ལས་ གནས་སྐབས་ཅིག་ ལམ་འགྲུལ་འབད་ནི་ཚུ་ བཀག་དམ་འབད་ནི་སྦེ་ གྲོས་ཐག་བཅད་མི་དང་འཁྲིལ་ཨིན་ཟེར་ཨིན་པས།
མི་མང་གི་ ཁ་ཐུག་ལས་འབད་རུང་ སེམས་དྲན་པ་བཏོན་ཏེ་ སྡོད་དགོཔ་མ་ཚད་ ཁྲིམས་བདག་འཛིན་འཐབ་མི་ ལས་སྡེ་ཚུ་ལུ་ མཉམ་འབྲེལ་གང་དྲག་འབད་དགོཔ་དེ་ཡང་ གལ་ཆེ་ཟེར་ ནང་སྲིད་བློན་པོ་གིས་ བཤད་པའི་ཁར་ ས་གནས་དེ་ནང་ ཉེན་སྲུང་གི་གནས་སྟངས་ལེགས་ཤོམ་འགྱོ་ཞིནམ་ལས་ བཀག་དམ་མེདཔ་བཟོ་འོང་ཟེར་ སླབ་ཨིན་པས།
དགེ་ལེགས་ཕུག་དང་ གསར་སྤང་གི་བར་ན་ ཉེན་སྲུང་གི་དོན་ལུ་ རྒྱུན་འགྲུལ་བཀག་དམ་འབདནིའི་ ལམ་ལུགས་ལག་ལེན་འཐབ་མི་དེ་ ད་རིས་ ཐེངས་དང་པ་མེན་མི་དེ་ཡང་ དུས་ཅིའི་ལོ་སྔ་ཆ་ལུ་ སྣུམ་འཁོར་ཚུ་ ཕྱི་རུ་འགྲུལ་བསྐྱོད་འབད་མ་ཆོགཔ་ བཟོ་ཡོད་རུང་ ས་གནས་ཀྱི་ མི་ཚུ་གིས་ ཁོང་རའི་བྱ་སྟབས་བདེ་མེན་ཡོད་ལུགས་དང་བསྟུན་ ལམ་འགྲུལ་འབད་མི་བཅུག་པས་ཟེར་བའི་ ཉོགས་བཤད་བཀོད་པའི་ཤུལ་ལས་ ཨ་རྟག་ག་ཨིནམ་སྦེ་ འགྲོ་འགྲུལ་འབད་བཅུག་ཡོདཔ་ཨིན་པས།
དེ་འབདཝ་ད་ ཁྲིམས་ལུགས་དེ་ ལག་ལེན་འཐབ་མ་དགོཔ་བཟོ་སྟེ་ ཡུན་རིང་མ་སོངམ་ལས་ར་ སྤྱི་ཟླ་༡༠ པའི་ཚེས་༢༢ ཀྱི་ཕྱི་རུ་ གསར་སྤང་དང་ དགེ་ལེགས་ཕུག་གི་བར་ན་ ལམ་འགྲུལ་འབད་མི་ དེད་གཡོགཔ་ཅིག་ གར་སོང་མེད་པར་ ཉིན་གྲངས་༡༨ ཀྱི་རིང་ བྱང་སྟོར་ཤོར་བའི་ཤུལ་ལུ་ ད་རུང་ སྤྱི་ཟླ་༡༡ པའི་ཚེས་༡༦ ལུ་ དགའ་སྐྱིད་གླིང་རྒེད་འོག་ལས་ གཡུས་ཁའི་རྩིསཔ་ཅིག་ མི་ངན་སྡེ་ཚན་ཅིག་གིས་ བཙན་བཟུང་ཐོག་ ཁྱིད་སོང་ཡོདཔ་ཨིན་པས།
སྤྱི་ཟླ་༡༢ པའི་ཚེས་༡༣ གྱི་ནུབ་མོར་ གཞུང་ལམ་བདའ་སྟེ་ འགྲོ་འགྲུལ་འབད་མི་ གླ་འཁོར་དེད་གཡོགཔ་ཅིག་ལུ་ བུཚ་༥ གིས་ གནོདཔ་བཀལ་ཡོདཔ་ད་ དགེ་ལེགས་ཕུག་གི་ ཁྲིམས་སྲུང་འགག་པ་ལས་གོ་མི་ ལོ་རྒྱུས་དང་འཁྲིལཝ་ད་ བུཚ་༥ གིས་ ཁོ་གི་གླ་འཁོར་བཀག་ཞིནམ་ལས་ ཁོ་གི་ལགཔ་གུ་ གྱི་གསོབ་བྱིན་ཡོདཔ་ཨིན་རུང་ གནོདཔ་བཀལ་མི་ཚུ་ ག་ཨིན་ན་ ངོས་འཛིན་འབད་མ་ཚུགས་པས་ཟེར་ཨིན་པའི་གནས་ཚུལ།
རིག་འཛིན་དབང་ཕྱུག།
No comments:
Post a Comment