དེ་མ་ཚད་ ཁྱིམ་རྐྱབ་ནིའི་དོན་ལུ་ མཛོད་ཁང་སྦེ་བཞག་མི་ ཁང་མིག་༡ ནང་ལས་ ཤིང་དང་ ལྕགས་ཤོག་ཐུམ་སྒྲིལ་༩ དེ་ཅིག་ཡང་ ཆུ་གིས་ འཕྱགས་བདའ་ཡོདཔ་ཨིན་པས།
ཁོ་གིས་ སླབ་མིའི་ནང་ སྤྱི་ཟླ་༧ པའི་ཚེས་༡༤ གི་ ཆུ་རུད་དེ་ ཆུ་གཡུར་གུ་ལས་ འོང་ནི་དེ་གིས་ ཟད་འགྲོ་སྦོམ་བཏང་སྟེ་ ད་རུང་ ཉེན་སྲུང་གི་ ཙིགཔ་རྐྱབ་ཅི་ཟེར་ཨིནམ་ད་ དེ་སྦེ་མ་འབད་བ་ཅིན་ ཁྱིམ་ཆ་མཉམ་ར་ འཕྱགས་བདའ་ནིའི་ ཉེན་ཁ་བྱུང་ཡི་ཟེར་ཨིན་པས།
དགེ་ལེགས་ཕུག་ཁྲོམ་གྱི་ ཆུ་གཡུར་དེ་ ནར་བཱ་དུར་གྱི་ ཁྱིམ་གྱི་རྩ་བ་ལས་མར་ འགྱོ་དོ་ཡོདཔ་ཨིན་པས།
ནཱར་བཱ་དུར་གྱིས་ སླབ་མིའི་ནང་ དེ་གི་སྐོར་ལས་ ཁྲོམ་སྡེ་ཡིག་ཚང་དང་ གསར་སྤང་རྫོང་ཁག་ལུ་ སྙན་ཞུ་འབད་བའི་ཤུལ་ལས་ ཞིབ་དཔྱད་འབད་མི་ལྷོད་ཡོད་རུང་ ག་ནི་ཡང་ མ་ཐོབ་ཟེར་ཨིན་པས།
ཁོ་གིས་ སླབ་མིའི་ནང་ ཁོ་རའི་ཁྱིམ་དེ་ ད་ལྟོ་ ཆརཔ་མེད་ནི་དེ་གིས་ གནས་སྐབས་ཅིག་གི་དོན་ལུ་ བརྟན་ཏོག་ཏོ་ཡོད་རུང་ དུས་ཅིའི་ལོ་ མཇུག་བསྡུ་རན་ཁར་ ལྷོད་ཡོདཔ་ལས་ དེ་ནང་ ཁྲོམ་སྡེ་གིས་ ཆུ་གཡུར་ཉམས་བཅོས་འབད་འབདཝ་མེདཔ་ལས་ སང་ཕོད་ གནམ་བྱཱར་གི་དུས་ཚོད་ལུ་ གལ་སྲིད་ ཆུ་རུད་འཐོན་པ་ཅིན་ ད་རུང་ ཁོ་གི་ཁྱིམ་དེ་ འཕྱགས་མི་འབག་ག་མནོ་བའི་ ཚ་གྱང་སྦོམ་སྦེ་ར་ ལངམ་ལང་སར་ སྡོད་དོ་ཟེར་ཨིན་པས།
གནམ་བྱཱར་གྱི་ ཆུ་རུད་དེ་གིས་ ནཱར་བཱ་དྷུར་གྱི་ ཁྱིམ་གྱི་མཇུག་ལུ་ཡོད་པའི་ ཁྲོམ་སྡེའི་ས་ཁོངས་ཀྱི་ཕྱི་ཁར་ མི་སེར་སོ་ནམ་པའི་ ཆུ་ཞིང་ཨེ་ཀར་༡༥༠ དེ་ཅིག་ཡོད་མི་ཚུ་གི་ ཞིང་ཆུའི་དོན་ལུ་ ཆུ་གཡུར་བཏོན་ཡོད་མི་དེ་ཡང་ ཆུ་རུད་ཀྱིས་ འཕྱགས་བདའ་བའི་ཤུལ་ལས་ ཉམས་བཅོས་མ་འབད་བར་ ལུས་ཡོདཔ་ཨིན་པས།
དགེ་ལེགས་ཕུག་ཁྲོམ་དཔོན་ རྣམ་རྒྱལ་གྱིས་ སླབ་མིའི་ནང་ ཁྱིམ་དེ་ ཁྲིམས་འགལ་གྱི་ཐོག་ལས་རྐྱབ་ཡོདཔ་ད་ ཆུ་གཡུར་ཉམས་བཅོས་འབད་ནིའི་དོན་ལུ་ ཁྲོམ་སྡེ་གིས་ འཆར་གཞི་ཚུ་ བཟོ་བའི་བསྒང་ཡོད་ཟེར་ ཨིན་པའི་གནས་ཚུལ།
དགེ་ལེགས་ཕུག་ལས་ ཚེ་རིང་རྣམ་རྒྱལ།
No comments:
Post a Comment