བློན་ཆེན་མཆོག་གིས་ མི་དབང་མངའ་བདག་རིན་པོ་ཆེ་མཆོག་ལུ་ བཀྲིན་ལེགས་སོ་ཞུ་ཡི།
 |
| ཁ་ཙ་ རྒྱལ་ཡོངས་ཚོགས་ཁང་ནང་ ཚོགས་ཐེངས་༩ པ་ དབུ་འཛུགས་གནང་པའི་བསྒང་། |
དེ་ཡང་ བཞུགས་གྲལ་ཕུན་སུམ་ཚོགས་པའི་ རྟེན་འབྲེལ་དང་བཅསཔ་སྦེ་ དབུ་འཛུགས་གནང་མི་ སྤྱི་ཚོགས་ལྷན་བཞུགས་ཀྱི་ རྟེན་འབྲེལ་ནང་ མི་དབང་མངའ་བདག་རིན་པོ་ཆེ་མཆོག་གིས་དབུ་གཙོས་པའི་ མི་དབང་རྒྱལ་བཙུན་མཆོག་དང་ སྐུ་འཁོར་ དེ་ལས་ རྒྱལ་ཁབ་ནང་ཡོད་མི་ འཛམ་གླིང་རྒྱལ་སྤྱི་ལས་སྡེའི་ སྐུ་ཚབ་དང་ གཞུང་གི་ཆེ་མཐོའི་འགོ་དཔོན་ཚུ་གིས་ འབྲེལ་གཏོགས་གནང་ཡི།
 |
| མི་དབང་མངའ་ཞབས་མཆོག་གིས་ རྒྱལ་ཡོངས་ཚོགས་སྡེའི་ འཐུས་མི་ཚུ་དང་ ཞལ་འདྲིས་གནང་པའི་བསྒང་། |
སྤྱི་ཚོགས་འགོ་འབྱེད་ཀྱི་ གསུང་བཤད་ནང་ རྒྱལ་ཡོངས་ཚོགས་འདུའི་ ཚོགས་དཔོན་འཇིགས་མེད་ཚུལ་ཁྲིམས་ཀྱིས་ ཚོགས་ཐེངས་༩ པའི་ནང་ དཔྱད་ཡིག་༥ དང་ རྒྱལ་སྤྱིའི་མཐུན་གྲོས་༣ ཚོགས་འདུའི་བྱ་རིམ་དང་འཁྲིལ་ གསུང་གྲོས་གནང་ནི་དང་ རྒེད་འོག་ཚོགས་སྡེ་གིས་ ཆ་འཇོག་གྲུབ་སྟེ་ རྒྱལ་ཡོངས་ཚོགས་སྡེའི་ནང་ཕུལ་མི་ དཔྱད་ཡིག་༣ དང་ རྒྱལ་ཡོངས་ཚོགས་སྡེའི་ཧོངས་ལས་ དཔྱད་ཡིག་ཁག་༢ གསུང་གྲོས་གནང་ནི་ཨིན་མི་ཚུ་ཡང་ རྒྱལ་ཡོངས་ཚོགས་སྡེའི་ ལས་རིམ་དང་འཁྲིལ་ གསུང་གྲོས་ལེགས་ཤོམ་སྦེ་གནང་བའི་ རེ་བ་ཡོད་ཟེར་གསུངས་ཡི།
ཚོགས་དཔོན་གྱིས་ གསུངས་མིའི་ནང་ འཛམ་གླིང་རྒྱལ་ཁབ་ནང་ལས་ཕར་ རང་བཞིན་རྐྱེན་ངན་གྱི་ སྟབས་བདེཝ་དང་མ་བདེཝ་ ག་དེ་སྦེ་ར་ ཐོན་ཏེ་འབད་རུང་ སྤྱིར་དཀོན་མཆོག་གསུམ་གྱི་ཐུགས་རྗེ་དང་ སྒོས་སུ་ མི་དབང་མངའ་བདག་རིན་པོ་ཆེའི་བཀྲིན་དང་ འབྲུག་མི་ཡོངས་ཀྱི་ བསོད་ནམགས་དང་ ཁ་རྗེ་ལས་བརྟེན་ རྒྱལ་ཁབ་ནང་ འདི་བཟུམ་མའི་ རྐྱེན་ངན་སྦོམ་ག་ནི་ཡང་ མ་བྱུང་རུང་ ད་རེས་ནངས་པ་ རྒྱལ་ཁབ་ནང་ རྒྱ་གར་གྱི་ རུ་པིའི་དཀའ་ངལ་ཐོན་ཡོད་མི་དེ་གིས་ མི་སེར་ལ་ལུ་ཅིག་ལུ་ དཀའ་ངལ་དུམ་གྲ་རེ་ བྱུང་སྟེ་འདུག་ཟེར་ཨིན་པས།
རུ་པིའི་དཀའ་ངལ་དེ་ འཕྲལ་མགྱོགས་སྦེ་ བསལ་ནིའི་དོན་ལུ་ གཞུང་གི་ཁ་ཐུག་ལས་ སྲིད་བྱུས་དང་ ཐབས་ཤེས་ཚུ་བཏོན་ཏེ་ ཕྱག་ལཱ་གནང་པའི་བསྒང་ཡོདཔ་བཞིན་དུ་ འདི་བཟུམ་མའི་ གནས་སྟངས་ཐོནམ་ད་ མི་སེར་ཚུ་གིས་འབད་རུང་ དུམ་གྲ་ཅིག་ གོ་ཤེས་བསམ་ཤེས་ཀྱི་ ཀུན་སློང་མཁྱེན་དགོཔ་འདི་ ཁག་ཆེ་ཟེར་ ཚོགས་དཔོན་གྱིས་གསུངས་ཡི།
འདི་བཟུམ་མའི་ དཀའ་ངལ་ཐོན་མི་དེ་གིས་ ང་བཅས་རའི་ དྲིན་ཅན་གྱི་ཕམ་ མི་དབང་འབྲུག་རྒྱལ་༤ པ་མཆོག་དང་ མི་དབང་མངའ་བདག་རིན་པོ་ཆོ་མཆོག་གིས་ འབྲུག་པའི་མི་སེར་ཚུ་ རང་གི་རྐངམ་གུ་ རང་ལོང་སྡོད་ཚུགསཔ་བཟོ་ནི་གི་དོན་ལུ་ མི་སྡེ་དཔལ་འབྱོར་དང་ གྲོང་གསེབ་ཀྱི་ འཚོ་བའི་གནས་སྟངས་ཚུ་ གོང་འཕེལ་གཏང་དགོ་པའི་ ཐུགས་ཀྱི་དགོངས་བཞེད་གནང་མི་དེ་ འགྲུབ་ཐབས་ལུ་ མི་སེར་ཚུ་གིས་ རང་གི་འཚོ་བ་ སོ་ནམ་གྱི་ལཱ་ལུ་ སྤྲོ་བ་དང་ བརྩོན་ཤུགས་ཐེབས་བསྐྱེད་དེ་ རོགས་ལས་རེ་མ་དགོཔ་བཟོ་ནི་གི་ དུས་ཚོད་ལུ་ ལྷོད་ཡོད་པའི་ རྟགས་མཚན་སྟོནམ་ཨིན་ཟེར་ ཚོགས་དཔོན་གྱིས་གསུངས་ཡི།
ཚོགས་དཔོན་གྱི་ གསུང་བཤད་ཀྱི་ཤུལ་ལས་ བློན་ཆེན་འཇིགས་མེད་འོད་ཟེར་འཕྲིན་ལས་མཆོག་གིས་ བཀའ་དྲིན་ལེགས་སོའི་ གྲོས་དོན་ཕུལ་མིའི་ནང་ ཉིནམ་༤ གི་ཧེ་མར་ མི་དབང་རྒྱལ་བཙུན་ རྗེ་བཙུན་པདྨ་དབང་ཕྱུག་མཆོག་ དགུང་ལོ་༢༢ བཞེས་པའི་འཁྲུངས་སྐར་དུས་ཆེན་དེ་ རྟེན་འབྲེལ་མ་འདྲཝ་ཅིག་གི་ཐོག་ལས་ བརྩི་སྲུང་འབད་ཚུགས་མི་དེ་ཡང་ འཁྲུངས་སྐར་གྱི་ ཉིནམ་བཟང་པོ་དེ་ ཚེས་༡༥ འམ་ དུས་ཆེན་ལྔ་འཛོམས་ལུ་ ཕོག་ནི་དེ་གིས་ཨིན་ཟེར་ཞུ་ཡི།
དུས་ཆེན་ཁྱད་པར་ཅན་ཅིག་ཨིན་མི་དེ་ཡང་ ང་བཅས་ར་ཆ་ཁྱབ་ འབྲུག་རྒྱལ་ཁབ་འདི་ནང་ ད་ལྟོ་ཚུན་ཚོད་ སྐྱིད་ཏོང་ཏོ་དང་ དགའ་ཏོག་ཏོ་ དེ་ལས་ ཞི་བདེའི་ཐོག་ལུ་ སྡོད་ཚུགས་མི་དེ་ ད་ལས་ཕར་འབད་རུང་ རྒྱལ་ཁབ་འདི་ གོང་ལས་གོང་དུ་འཕེལ་ནི་གི་ རྟགས་མཚན་ཅིག་ཨིན་པས་ཟེར་ བློན་ཆེན་གྱིས་ ཞུ་ཡི།
བློན་ཆེན་གྱིས་ སྤྱི་ཚོགས་དང་པའི་ཚོགས་ཐེངས་༩ པའི་ནང་ མི་དབང་མངའ་བདག་རིན་པོ་ཆེ་མཆོག་ ཞབས་ཀྱིས་བཅགས་གནང་མི་ལུ་ བཀྲིན་ཆེ་ཟེར་ ཞུ་བའི་ཁར་ མི་དབང་མཆོག་གིས་ ད་ཚུན་གྱི་བར་ན་ སྤྱི་ཚོགས་ཀྱི་ ཚོགས་ཐེངས་དང་པ་ལས་ ཚར་ཅིག་ཡང་མ་ཆད་པར་ བྱོན་གནང་ཡོདཔ་མ་ཚད་ བཀའ་སློབ་བཟང་པོ་གནང་མི་ལུ་བརྟེན་ ག་ནི་བ་གལ་ཆེ་བའི་ སྲིད་བྱུས་དང་ ཁྲིམས་བཟོའི་གསུང་གྲོས་ནང་ གནམ་མེད་ས་མེད་ཕན་ཐོགས་བྱུང་ཡི་ཟེར་ཞུ་ནི།
བློན་ཆེན་གྱིས་ ཚོགས་དམངས་ལུ་ གནས་ཚུལ་དང་འདྲཝ་སྦེ་ ཞུ་མིའི་ནང་ སྤྱི་ཚོགས་་དང་ རྒྱལ་གཞུང་གི་ གནས་ཡུན་དེ་ ལོ་༡ ལས་བརྒལ་མེད་རུང་ ཁྲིམས་བཟོ་དགོཔ་དང་ གཞུང་གི་ཁ་ཐུག་ལས་ མི་སེར་གྱི་ འཚོ་བའི་གནས་སྟངས་ཡར་དྲག་བཟོ་ནིའི་དོན་ལུ་ མི་སྡེ་དཔལ་འབྱོར་གོང་འཕེལ་དང་འབྲེལ་བའི་ ལཱ་འབད་དགོཔ་མང་རབས་ཅིག་ཡོད་ཟེར་ཨིན་པས།
སྤྱི་ཚོགས་ཀྱི་ འཐུས་མི་ཡོངས་དང་ གཞུང་ ལྷན་རྒྱས་གཞུང་ཚོགས་ ཞི་གཡོགཔ་ཆ་མཉམ་ར་ ཤུལ་མའི་ལོ་༡ གི་རིང་ལུ་ ལཱ་མང་ཧད་རྫོགསཔ་ཅིག་ ག་དེ་སྦེ་ མཇུག་བསྡུ་ཚུགས་ག་ཟེར་ ཚ་གྱང་སྦོམ་སྦེ་ ལང་ཡོད་རུང་ ང་བཅས་ཀྱིས་ ཅི་ལྕོགས་གང་ལྕོགས་ཀྱི་ཐོག་ལས་ ལཱ་རྩ་འགེངས་འབད་དོ་ཟེར་ བློན་ཆེན་གྱིས་ ཞུ་ཡོད་པའི་གནས་ཚུལ།
རིག་འཛིན་དབང་ཕྱུག།
No comments:
Post a Comment