 |
མི་དབང་རྒྱལ་པོའི་སྲསམོ་ ཨ་ཞེ་འཆི་མེད་གཡང་འཛོམས་དབང་ཕྱུག་མཆོག་ གཞིས་གཉེར་གཟེངས་ཐོན་རྟགས་མ་ཐོབ་མི་ རཱ་བི་ཀ་ པར་དཱན་དང་ ར་གླིང་ངག་དབང་འབྲུག་གྲགས་དང་གཅིག་ཁར་ ལྷན་བཞུགས།
|
༉ ཁ་ཙ་ འཛམ་གླིང་རང་བཞིན་གནས་སྟངས་ཀྱི་ཉིནམ་ བརྩི་སྲུང་དང་འབྲེལ་ཏེ་ ལོ་བསྟར་བྱིན་སྲོལ་ཡོད་པའི་ འཇིགས་མེད་སེངེྒ་དབང་ཕྱུག་མཐའ་འཁོར་གནས་སྟངས་ ཁྱད་དུ་འཕགས་པའི་ གཞིས་གཉེར་གཟེངས་ཐོན་རྟགས་མ་དེ་ མི་དབང་རྒྱལ་པོའི་སྲསམོ་ ཨ་ཞེ་འཆི་མེད་གཡང་འཛོམས་དབང་ཕྱུག་མཆོག་གིས་ རཱ་བི་ཀ་ པར་དཱན་དང་ ར་གླིང་ངག་དབང་འབྲུག་གྲགས་ལུ་གནང་ཡི།
གཟེངས་ཐོན་རྟགས་མ་ཐོབ་མི་ རཱ་བི་ཀ་ པར་དཱན་དེ་ རྒྱལ་གཞུང་རང་བཞིན་སྲུང་སྐྱོབ་ཚོགས་སྡེའི་ ལས་བྱེདཔ་ཅིག་ཨིནམ་ད་ མོ་གིས་ འབྲུག་གི་ སྐྱེ་ཤིང་སྣ་ཚོགས་དང་ བྱ་རིགས་སྣ་ཚོགས་ཀྱི་སྐོར་ལས་ ཞིབ་འཚོལ་འབད་ནི་ལུ་ བརྩོན་ཤུགས་བསྐྱེད་མི་ཅིག་ཨིནམ་ད་ མི་དབང་ཨ་ཞེ་མཆོག་གིས་ གཟེངས་ཐོན་རྟགས་མ་གནངམ་དང་འབྲེལ་ རཱ་བི་ཀ་ པར་དཱན་དེ་ འབྲུག་གི་ སྐྱེ་ཤིང་བརྒྱ་ཆ་༩༠ དེ་ཅིག་ ཤེས་གསལ་ཡོད་མི་ ཡོངས་གྲགས་ཅན་ཅིག་ཨིནམ་སྦེ་གསུངས་ཡི།
དེ་ལས་ གཟེངས་ཐོན་རྟགས་མ་ཐོབ་མི་ གཞན་མི་དེ་ ད་ལྟོ་ རྒྱལ་ཡོངས་ནང་པའི་གསོ་རིག་སློབ་སྦྱོང་སྤེལ་ཁང་གི་ ལས་བྱེདཔ་ཅིག་ཨིན་མི་ ར་གླིང་ངག་དབང་འབྲུག་གྲགས་ཨིནམ་ད་ ཁོ་གིས་ སྐྱེ་ཤིང་དང་ མེ་ཏོག་སྣ་ཚོགས་ཀྱི་ ཞིབ་འཚོལ་འབད་དེ་ འབྲུག་གི་ སྨན་རིགས་དང་ མེ་ཏོག་སྣ་ཚོགས་ཀྱི་པར་ ལེ་ཤ་བཏབ་ཡོད་མི་ཚུ་ འབྲུག་གི་ འགྲེམ་རྟགས་ཚུ་ནང་ ལག་ལེན་འཐབ་ཡོདཔ་ད་ ཁོ་ར་ སྐྱེ་ཤིང་ཉམས་སྲུང་ནང་ བརྩོན་ཤུགས་བསྐྱེད་མི་ཅིག་ ཨིན་ཟེར་ཨིན་པས།
གཟེངས་ཐོན་རྟགས་མ་ཐོབ་མི་༢ ཀྱིས་ མི་དབང་རྒྱལ་པོའི་སྲསམོ་ ཨ་ཞེ་འཆི་མེད་གཡང་འཛོམས་དབང་ཕྱུག་མཆོག་དང་ བློན་ཆེན་འཇིགས་མེད་འོད་ཟེར་འཕྲིན་ལས་མཆོག་གིས་ ཕྱག་རྟགས་གནང་ཡོད་པའི་ རྟགས་མ་དང་གཅིག་ཁར་ དངུལ་ཀྲམ་༡༠༠,༠༠༠ རེ་ཐོབ་ཡོདཔ་ཨིན་པས།
གཟེངས་ཐོན་རྟགས་མ་དེ་ མི་དབང་འབྲུག་རྒྱལ་༤ པ་མཆོག་ འཛམ་གླིང་ནང་ འབྲུག་གི་རང་བཞིན་གནས་སྟངས་ཉམས་སྲུང་དེ་ ཁྱད་འཕགས་ཅན་ཨིན་པའི་ སྲིད་ཀྱི་རིང་ལུགས་ གཞི་བཙུགས་གནང་ཡོད་པའི་ ངོས་འཛིན་རྗེས་དྲན་ལུ་ ལོ་བསྟར་བཞིན་དུ་ རང་བཞིན་གནས་སྟངས་སྲུང་སྐྱོབ་ནང་ བརྩོན་ཤུགས་བསྐྱེད་མི་ འབྲུག་མི་༢ ལུ་ གཟེངས་ཐོན་རྟགས་མ་བྱིན་ནི་ འགོ་བཙུགས་ཡོདཔ་ཨིན་པས།
རྟགས་མ་བྱིན་ནི་དེ་ཡང་ འབྲུག་གཞུང་གི་ངོ་ཚབ་ལུ་ ཨོ་རྒྱན་དབང་ཕྱུག་ཉམས་སྲུང་དང་རང་བཞིན་སློབ་སྦྱོང་ལྟེ་བ་དང་ ཨ་ཞེ་འཆི་མེད་གཡང་འཛོམས་དབང་ཕྱུག་མཆོག་གིས་ སྐྱབས་འཛིན་གནང་མི་ འབྲུག་སྐྱེ་སྣ་ཚོགས་སྡེ་གིས་ མཉམ་རུབ་ཐོག་ལས་ འགོ་འདྲེན་འཐབ་དོ་ཡོདཔ་ཨིན་པས།
དེ་བཟུམ་སྦེ་ ལྷམ་ལེགས་བཅོས་ཚོགས་པའི་ སྡེ་ཚན་གྱིས་ཡང་ ཁ་ཙ་ ཐིམ་ཁྲོམ་ནང་འཁོད་ལས་ ལྷམ་རྙིངམ་ཚུ་ བསྡུ་བསྒྱོམ་འབད་ནིའི་ ལས་རིམ་ཐེངས་༢ པ་ འགོ་འདྲེན་འཐབ་ཡོདཔ་ད་ ལས་རིམ་ལུ་ རྒྱབ་སྐྱོར་འབད་མི་ ལས་སྡེ་ཁག་དང་ མི་མང་ཚུ་ལུ་ཡང་ ལེགས་བསྟོད་ཀྱི་རྟགས་མ་ཚུ་ ཨ་ཞེ་འཆི་མེད་གཡང་འཛོམས་དབང་ཕྱུག་མཆོག་གིས་ གནང་ཡི།
ལྷམ་ལེགས་བཅོས་ཚོགས་པ་དེ་གིས་ ན་ཧིང་ ཐིམ་ཕུ་ལུ་ ལྷམ་རྙིངམ་བསྡུ་བསྒྱོམ་གྱི་ ལས་རིམ་འགོ་འདྲེན་འཐབ་པའི་སྐབས་ ལྷམ་ཡོངས་བསྡོམས་ཆ་༢༣,༠༠༠ ཐོབ་ཡོད་མི་ལས་ ལྷམ་ཆ་༡༣,༠༠༠ དེ་ཅིག་ ལེགས་བཅོས་འབད་དེ་ འབྲུག་གི་ཤར་ནུབ་དང་ ལྷོ་མཚམས་ཀྱི་ རྫོང་ཁག་ཚུ་ནང་ གཡུས་མི་ཚུ་ལུ་ བགོ་བཀྲམ་འབད་ཡོདཔ་ཨིན་པས།
ཁ་ཙ་ ལྷམ་ཆ་༢,༠༠༠ དེ་ཅིག་ བསྡུ་བསྒྱོམ་འབད་ཚུགས་པའི་ རེ་བ་ཡོད་ཟེར་ ཨིན་པའི་གནས་ཚུལ།
བསམ་གཏན་ཡེ་ཤེས།
No comments:
Post a Comment