 |
| ཤེས་རིག་བློན་པོ་ ཐྲ་ཀུར་སིང་པའུ་ཌེལ་གྱིས་ སློབ་གཉེར་གྲོགས་རམ་སྐོར་ལས་ སློབ་ཕྲུག་ཚུ་ལུ་ བཀའ་སློབ་གནང་པའི་བསྒང་། |
ཤེས་རིག་ལྷན་ཁག་ སློབ་གཉེར་གྲོགས་རམ་དང་ སློབ་ཕྲུག་རྒྱབ་སྐྱོར་སྡེ་ཚན་གྱིས་ འགོ་འདྲེན་འཐབ་མི་ ཉིནམ་༢ ཀྱི་ གོམས་འདྲིས་ལས་རིམ་ནང་ རྒྱལ་ཁབ་ནང་ལས་ སློབ་རིམ་༡༢ པ་མཐར་འཁྱོལ་མི་ཚུ་དང་ ནང་པའི་ཆོས་སྡེ་ཚུ་ནང་ལས་ སཾ་ཀྲིཊ་ལྷབ་པར་འགྱོ་མི་ དགེ་སློང་༧ རྩིས་པའི་ སློབ་ཕྲུག་༢༢༨ ཀྱིས་ བཅའ་མར་གཏོགས་ཡོདཔ་ཨིན་པས།
གོམས་འདྲིས་ལས་རིམ་ནང་ སློབ་ཕྲུག་ཚུ་ལུ་ འབྲེལ་ཡོད་ལས་ཁུངས་དང་ ལས་སྡེའི་འགོ་དཔོན་ཚུ་གིས་ སློབ་དུས་ལུ་ ན་གཞོན་ཚུ་གིས་མནོ་བསམ་གཏང་ཐངས་དང་ སྤྱོད་ལམ་ ཞི་གཡོག་ཆོས་རྒྱུགས་ཀྱི་འཛུལ་ཞུགས་ཁྱད་ཚད་དགོས་མཁོ་དང་ ལམ་ལུགས་ཀྱི་སྐོར་ལས་ གོ་བ་བརྡ་སྤྲོད་འབད་ཡོདཔ་ཨིན་པས།
གོམས་འདྲིས་ལས་རིམ་ མཇུག་བསྡུའི་རྟེན་འབྲེལ་ནང་ ཤེས་རིག་བློན་པོ་ ཐྲ་ཀུ་སིང་ པའུ་ཌེལ་གིས་ སློབ་ཕྲུག་ཚུ་ལུ་ བཀའ་སློབ་བཟང་པོ་ མང་རབས་ཅིག་གནང་མིའི་ནང་ སློབ་གཉེར་གྲོགས་རམ་ཐོབ་མི་ སློབ་ཕྲུག་མང་ཤོས་ཅིག་གིས་ ད་ལྟོ་ འབྲུག་པའི་ས་མཚམས་བརྒལ་མ་འགྱོ་མི་ཡོདཔ་ལས་ ཕྱི་རྒྱལ་ཁབ་ཚུ་ནང་ལྷོདཔ་ད་ གཟུགས་ཁམས་དང་མཐའ་འཁོར་གནས་སྟངས་ དེ་ལས་སེམས་ཁམས་དང་འབྲེལ་བའི་ གདོང་ལེན་འབད་དགོཔ་ལེ་ཤ་ཡོདཔ་ལས་ ད་ལྟོ་ལས་ གྲ་སྒྲིག་འབད་དགོ་ཟེར་ཨིན་པས།
ཤེས་རིག་བློན་པོ་གིས་ བཤད་མིའི་ནང་ སློབ་ཕྲུག་ལ་ལུ་ཅིག་གིས་ རང་ལུ་ལྕོགས་གྲུབ་སྦོམ་ཡོད་རུང་ ཁྲོམ་གྱི་གནས་སྟངས་ནང་ཤུགས་ཐལ་ཏེ་ འཛོལ་བའི་ལཱ་འབད་ནིའི་ཉེན་ཁ་ཡོདཔ་ལས་ རང་གིས་རང་ལུ་ཤ་ཚ་དགོཔ་དེ་ག་ནི་བ་གལ་ཆེ་ཟེར་གསུངས་ཡི།
དུས་ཅི་ལས་ གཞུང་གིས་ སློབ་ཕྲུག་ཚུ་ལུ་ ཧེ་མ་མེད་པའི་ དམིགས་བསལ་ཤེས་ཡོན་དང་ རྒྱལ་སྤྱི་མཐུན་འབྲེལ་ བཟོ་སྐྲུན་འཛིན་སྐྱོང་བཟོ་རིག་ རྒྱང་འཕྲིན་བཟོ་རིག་གི་ཆོས་ཚན་ཁག་དག་པ་ཅིག་ནང་ གཙུག་ལག་ཤེས་ཡོན་གསརཔ་ཚུ་ཡོདཔ་ཨིན་པས།
ཆོས་ཚན་ཁག་སོ་སོ་ནང་ ཤེས་ཡོན་སྦྱང་པར་འགྱོ་ནི་ལུ་ དང་འདོད་ཅན་གྱི་སློབ་ཕྲུག་ཚུ་གིས་ དུས་ཅི་ སྤྱི་ཟླ་༦ པ་ ༧ པ་ ༨ པ་དང་༩ པ་ལུ་ མཐོ་རིམ་སློབ་གྲྭ་དང་ གཙུག་ལག་སློབ་གྲྭ་ཚུ་ནང་ རང་སོའི་སློབ་དུས་ཚུ་དང་འཁྲིལ་ འཛུལ་ཞུགས་འབད་ནི་ཨིན་པའི་གནས་ཚུལ།
ཚེ་རིང་རྣམ་རྒྱལ།
No comments:
Post a Comment