བསོད་ནམས་སྟོབས་རྒྱས་ཀྱིས་ བྷུ་ཊཱན་ཀུན་མཉམ་པར་ཊི་གི་ ལས་རྟགས་གསལ་སྟོན་འབད་བའི་བསྒང་། |
དེ་ཡང་ སྲིད་ཚོགས་གསརཔ་༤ པ་ བྷུ་ཊཱན་ཀུན་མཉམ་པར་ཊི་གི་མགྲིན་ཚབ་ བསོད་ནམས་སྟོབས་རྒྱས་ཀྱིས་ སླབ་མིའི་ནང་ ཁོང་གི་ སྲིད་ཚོགས་ཀྱིས་ དཔལ་འབྱོར་གོང་འཕེལ་གཏང་ནི་ལུ་ བརྩོན་ཤུགས་བསྐྱེད་ནི་ཟེར་ཨིནམ་ད་ ཨིན་རུང་ ལས་རྟགས་ཀྱི་ གསལ་བཤད་དང་འཁྲིལ་བ་ཅིན་ ལྟ་བ་དེ་ རྒྱལ་ཡོངས་དགའ་སྐྱིད་དཔལ་འཛོམས་ཀྱི་ ཀ་ཆེན་༤ ལས་ ལོགས་སུ་མེད་པའི་ མངོན་གསལ་བྱུང་ཡི།
སྲིད་ཚོགས་ཀྱི་ ལས་རྟགས་དེ་ ཁ་དོག་སྣ་༥ འི་ཐིག་ཁྲ་གིས་ སྒོར་བའི་སྦུག་ལུ་ ནོར་བུའི་དབྱིབས་སེརཔོ་དེ་ རྩ་བ་༣ ལུ་ ཐ་དམ་ཚིག་ཅན་གྱི་ སྔར་སྲོལ་གྱིས་ཕྱུག་པའི་ངོ་རྟགས་དང་ ཁ་དོག་ལྗང་ཁུ་སྦེ་ཡོད་མི་དེ་ རང་བཞིན་ཐོན་སྐྱེད་ཉམས་སྲུང་ཐོག་ ཡུན་བརྟན་གོང་འཕེལ་གཏང་ནི་ལུ་ བརྩོན་ནིའི་ངོ་རྟགས་ཨིན་པས།
དེ་ལས་ རྒྱ་སྨུག་སྦེ་ཡོད་མི་དེ་ གོ་སྐབས་འདྲ་མཉམ་དང་ སྤྱི་སྙམས་ཀྱི་ མི་སྡེའི་དཔལ་འབྱོར་གོང་འཕེལ་དང་ དམརཔོ་དེ་ བརྩེ་གདུང་མཚོན་པའི་ཁ་དོག་ཨིནམ་ལས་ ཚོགས་པ་གིས་ རྒྱལ་ཁབ་ཀྱི་ཕན་བདེ་ལུ་ གཅིག་སྒྲིལ་གྱི་ངོ་རྟགས་དང་ སྦུག་ལུ་ཁ་དོག་ཧོནམོ་ཡོད་མི་དེ་ གཞུང་སྐྱོང་ལེགས་ལྡན་གྱི་ངོ་རྟགས་ ཨིན་ཟེར་ཨིན་པས།
ཕྱི་སྐོར་ལུ་ ཁ་དོག་༥ པོ་དེ་ སླ་མ་བསྲེས་པར་ གཅིག་སྒྲིལ་ཐོག་ སྒོར་སྒོར་སྦེ་ཡོད་མི་དེ་ དོན་ཚན་དེ་ཚུ་ག་ར་ གཅིག་སྒྲིལ་ཐོག་ རྒྱལ་ཡོངས་དགའ་སྐྱིད་དཔལ་འཛོམས་ལུ་ གཙོ་བོར་བཏོན་པའི་ རྟགས་མཚན་ཨིན་ཟེར་ཨིན་པས།
དེ་ཡང་ སྲིད་དོན་ཚུ་ ཆ་མཉམ་དང་ཁྱད་པར་མེད་པའི་ གནས་སྟངས་ཅིག་ཨིནམ་ལས་ སྲིད་ཚོགས་གཞན་དང་མ་འདྲ་བའི་ སོ་སོར་ཅིག་ ག་ཅི་ཡོད་ག་ཟེར་བའི་སྐབས་ བསོད་ནམས་སྟོབས་རྒྱས་ཀྱིས་འབད་བ་ཅིན་ སྲིད་ཚོགས་དེ་གིས་ གཙོ་བོ་ར་ ནང་འཁོད་ཀྱི་འཐུས་མི་ཚུ་ག་ར་ རྒྱལ་ཁབ་ཀྱི་ཞབས་ཏོག་ལུ་ རང་སོའི་ཁེ་འབབ་དང་ དལ་དབང་བློས་གཏང་ནུམ་པའི་ སེམས་ཤུགས་ཅན་ཚུ་གིས་ མཉམ་འབྲེལ་འབད་ནི་ལུ་ གཙོ་བོར་བཏོན་ཏེ་ ཁྱད་པར་བཟོ་ཚུགས་པའི་ རེ་བ་ཡོད་ཟེར་ཨིན་པས།
ཚོགས་པའི་འདེམས་ངོའི་ གྲ་སྒྲིག་ཚུ་ ག་དེ་སྦེ་ར་ སོང་ཡོདཔ་ཨིན་ན་ཟེར་བའི་སྐབས་ སླབ་མ་བཏུབ་ཨིན་རུང་ མགྲིན་ཚབ་དེ་གིས་འབད་བ་ཅིན་ ཁོང་གི་སྲིད་ཚོགས་དེ་ བརྡ་བརྒྱུད་ལུ་ གསལ་བསྒྲགས་འབད་འོས་པའི་ འདེམས་ངོའི་གྱངས་ཁ་ ཧ་ལམ་ གྲ་སྒྲིག་ཡོད་ཟེར་བཤད་ཅི།
དེ་བཟུམ་སྦེ་ སྲིད་ཚོགས་ཀྱི་ཁྲི་འཛིན་ཡང་ འདི་ཨིན་ཟེར་ མེདཔ་ཨིན་རུང་ ཁོ་གིས་འབད་བ་ཅིན་ ཁོང་གི་ སྲིད་ཚོགས་ཀྱི་འཐུས་མིའི་གྲས་ཁར་ ལྕོགས་གྲུབ་ཅན་གྱི་ འགོ་ཁྲིད་པའི་ འོས་ངོ་ལེ་ཤ་ཡོདཔ་ལས་ བཙག་འཐུ་ལྷན་ཚོགས་དང་གཅིག་ཁར་ ཐོ་བཀོད་འབད་ཞིནམ་ལས་ ལམ་ལུགས་བསྟར་དུ་ ཁྲི་འཛིན་ཡང་ བཙག་འཐུ་འབད་དེ་ ཚོགས་པའི་འདེམས་ངོ་ཚུ་ གསལ་བཀོད་འབད་འོང་ཟེར་ སླབ་ཨིན་པས།
ཁོང་གི་སྲིད་ཚོགས་ཀྱིས་ ལོ་༢ དེ་ཅིག་གི་ ཧེ་མ་ལས་ར་ གཞི་རྟེན་གྱི་ལཱ་ཚུ་འབད་ནི་ འགོ་བཙུགས་ཏེ་ དུས་ཚོད་ཡུན་རིངམོ་སྦེ་ར་ སོང་ཡོདཔ་ལས་ གྲུབ་འབྲས་ལེགས་ཤོམ་འབྱུང་ཚུགས་པའི་ རེ་བ་ཡོདཔ་མ་ཚད་ སྲིད་ཚོགས་ནང་ སྲིད་ཚོགས་གཞན་ལས་འོང་མི་ འདེམས་ངོ་དང་འཐུས་མི་ཚུ་ ག་ཡང་མེད་པར་ གཞན་དང་འབྲེལ་བ་མེད་པའི་ སྲིད་ཚོགས་གསརཔ་ཅིག་ཨིན་ཟེར་བཤད་ཅི།
སྲིད་ཚོགས་གསརཔ་དེ་གིས་ བརྡ་བརྒྱུད་ཐོག་ལས་ མི་སེར་ཚུ་ བཙག་འཐུ་ནང་ བཅའ་མར་གཏོགས་ནི་གི་ དང་འདོད་གསལ་བཀོད་འབདཝ་དང་འབྲེལ་ འབྲུག་ལུ་ ཐོ་བཀོད་ཅན་གྱི་སྲིད་ཚོགས་ འབྲུག་ཕུན་སུམ་ཚོགས་པ་དང་ མེ་སེར་དམངས་གཙོ་ཚོགས་པ་༢ དེ་ལས་ ད་ལྟོ་ ཐོ་བཀོད་མ་འབད་རུང་ དང་འདོད་གསལ་བཀོད་འབད་མི་ སྲིད་ཚོགས་གསརཔ་ བྷུ་ཊཱན་ཀུན་མཉམ་པར་ཊི་དང་ འབྲུག་མཉམ་རུབ་ཚོགས་པ་ འབྲུག་སྤྱི་དབང་ཚོགས་པ་ དེ་ལས་ འབྲུག་མི་སེར་ཚོགས་པ་བཅས་ བསྡོམས་སྲིད་ཚོགས་༦ དེ་ཅིག་གིས་ ཤུལ་མའི་ རྒྱལ་ཡོངས་བཙག་འཐུའི་ནང་ དོ་འགྲན་འབད་ནི་ཨིན་པའི་གནས་ཚུལ།
བསམ་གཏན་ཡེ་ཤེས།
No comments:
Post a Comment